واہ تیری تبدیلی، لودھراں میں نیب زدہ ٹھاکروں کو معذور بچوں کی رکھوالی سونپ دی

 واہ تیری تبدیلی، لودھراں میں نیب زدہ ٹھاکروں کو معذور بچوں کی رکھوالی سونپ دی 

تحریر : رانا آصف حنیف 

قربان جاؤں اپنے کپتان کے کہ جنہوں نے لودھراں میں سپیشل بچے یعنی ذہنی کمزروری،بصارت، سماعت اور گویائی سے محروم معذور معصوم بچوں کی وزارت میں گیلے وال سے منتخب ایم پی اے نذیر خان بلوچ کو پارلیمانی سیکرٹری کا عہدہ بخشا ۔جناب کپتان صاحب کیا لودھراں کا یہ مخصوص اور انتہائی توجہ کا حامل طبقہ آپ کو اتنا برا، ناگوار اور دشمن لگا کہ اس کی ذمہ داری نیب زدہ چہیتوں کی جھولی میں ڈال دی ۔او بابا ان کے تو اپنے مسائل بہت ہیں۔ بے چاروں کا سارا رقبہ نیب نے قبضے میں لے لیا ۔سمن پہ بھی سمن جاری کرکے کرکے انہیں بستر علالت پر پہنچا دیا ۔ضمانتیں ہیں کہ اب گریں کہ اب ،انہیں کیا ہوش ہو کہ پورے پنجاب تو درکنار ان کے اپنے ضلع کی اپنی تحصیل میں مخصوص بچوں کا سنٹر تعمیر کی تکمیل کو ترس رہا ہے ۔معصوم بچے دو کمروں کی ایک گندی سی بلڈنگ میں ٹھونس دیے گئے ہیں ۔ان کو لانے لے جانے والی بس میں جگہ نہ ہونے کے باعث بنا سواری کے پچاس سے زائد بچے ایسے بھی ہیں جو گھروں میں مقید ہوکر بیٹھے ہیں ۔ کم جگہ میں تعلیم کا شوق کورونا ایس اوپیز کی خلاف ورزی کروا گیا اور معصوم بچے اس وباء کا شکار ہو چکے اسی وجہ سے اکلوتا سکول بند ہوچکا ہے ۔مجھے کامل یقین ہے کہ میرے محترم پارلیمانی سیکرٹری صاحب کو اپنی تحصیل کے واحد سکول اور ایسے بچوں کے ان تمام مسائل کا علم تک نہ ہوگا اور یہ پورے پنجاب کو سنبھالنے چلے ہیں ۔جناب کپتان خان صاحب ان نیب زدہ ٹھاکروں کو ابھی اپنے مسائل سلجھا لینے دیں اور اُس وقت تک میرے ضلع کے معصوم معذور اور حقدار بچوں پر آپ براہ راست توجہ دے لیں